¶ Capitulum iij

ANd so syre Tristram rode longe after this stronge knyght / And at the laste he sawe where lay a lady ouerthwarte a dede knyght / Faire lady said sir Tristram who hath slayne your lord / Syr she said here came a knyght rydyng as my lord and I rested vs here / and asked hym of whens he was / and my lord said of Arthurs courte / therfore said the stronge knyght I wille Iuste with the / for I hate alle these that ben of Arthurs Courte / And my lord that lyeth here dede amounted vpon his hors / and the stronge knyght and my lord encountred to gyder / and there he smote my lord thorugh oute with his spere / and thus he hath broughte me in grete woo and dammage / That me repenteth said sire Tristram of your grete anger / and hit please you / telle me your husbandes name / syr said she his name was Galardoun that wold haue preued a good knyghte / Soo departed sir Tristram from that dolorous lady and hadde moche euylle lodgyng / Thenne on the thyrdde day syr Tristram mette with syr Gawayne and with sir Bleoberys in a forest at a lodge and eyther were sore wounded / Thenne syre Tristram asked syr Gawayne and syr Bleoberys yf they met with suche a Knyghte with suche a cognoyssaunce with a keuerd shelde / Faire syr said these knyghtes suche a knyght met with vs to oure grete dommage / & fyrst he smote doune my felawe syre Bleoberys & sore woūded Page  417 [leaf 209r] hym / by cause he badde me I shold not haue ado with hym For why he was ouer stronge for me / That strong knyght toke his wordes at scorne and said he said it for mockery / And thenne they rode to gyders / and soo he hurte my felawe / And whan he had done so / I myght not for shame / but I must Iuste with hym / And at the fyrst course he smote me doune / and my hors to the erthe / And there he had al moost slayne me / and from vs he took his hors / and departed / and in an euyll tyme we mette with hym / Faire knyghtes said sir Tristram soo he mette with me / and with another knyght that hyght Palomydes / and he smote vs bothe doune with one spere / and hurt vs ryght sore / By my feythe said sir Gawayne by my counceil ye shalle lete hym passe / and seke hym no ferther / for at the nexte feest of the round table vpon payne of my hede ye shalle fynde hym there / By my feythe said sir Tristram I shall neuer reste tyl that I fynde hym / And thenne sir Gawayne asked hym his name / thenne he said my name is sir Tristram / and so eyther told other their names / and thenne departed syr Tristram / and rode his way / And by fortune in a medowe sire Tristram mette with sir Kay the seneschal and sir Dynadan / What tydynges with you said sir Tristram with you Knyghtes / Not good said these knyghtes / why soo said sir Tristram I praye you telle me / for I ryde to seke a knyght / what cognoyssaunce bereth he said sir Kay / He bereth said sir Tristram a couerd sheld close with clothe / By my hede said sir Kay that is the same Knyght that mette with vs / for this nyght we were lodged within a wydowes hous / and there was that knyght lodged / And whanne he wyst we were of Arthurs court / he spak grete vylonye by the kynge / and specially by the Quene Gueneuer /

¶ And thenne on the morne was waged bataille with hym for the cause / And at the fyrst recoūtre said sir kay he smote me doune from my hors / and hurte me passynge fore / And whanne my felawe syr Dynadan sawe me smyten doune and hurte / he wold not reuenge me / but fledde from me / And thus is he departed / And thenne sir Tristram asked them theyr names / and soo eyther told other their names / And soo syre Tristram departed from syr kay / and from sir Dynodan / and so he past thurgh a grete forest in to a playne tyl he was ware Page  418 [leaf 209v] of a pryory / and there he reposed hym with a good man fyxe dayes