VOLATILE, Proprie pro eo avium genere, quæ in cortibus rusticis nutriuntur. Volature, in Consuetudine Aquensi tit. 12. art. 9. Volture, in Aurelianensi art. 162. Conventus Aquisgranensis anno 817. cap. 8. et Addit. 1. Capitul. cap. 8 :

Ut Volatilia intus forisque, nisi pro infirmitate, nullo tempore comedant (Monachi.)

Adde cap. 9. Joannes Italus in Vita S. Odonis Abbat. Cluniac. lib. 3 :

Ibat autem circa pedes grex cornicum, quas nos Gallinas vocamus. Tunc quasi furens quoddam bacillum arripuit, et, quam ei placuit, percussit, ac furibundo ore dixit : Hæc erit hodie mihi piscis. Cæteri siquidem, qui circumstabant, cum quodam rubore cœperunt ei dicere, fortassis licet tibi carnem comedere, pater ? At ille, Volatile, inquit, non est caro, Volatilia enim et pisces unam habent originem, etc.

Adde Constantinum Africanum lib. 1. de Morbor. cognit. cap. 10.